Practicar senderismu y percorrer los montes de Samartín del Rei Aurelio peles rutes de monte permite a los/es visitantes disfrutar del sosiegu que se respira lloñe de los nucleos urbanos y metese na vida tranquila de los llugares rurales

L'Aniellu de Samartín

Samartín del Rei Aurelio ofrez un circuitu de gran percorríu de monte de 50 kilómetros pa mountainbike y trekking, con una pendiente acumulada de 1.900 metros. Ye una ruta circular que fai’l perímetru del conceyu per pistes forestales, caminos y carreteres locales, llendando colos conceyos de Llaviana, Bimenes, Mieres, Llangréu y Siero. Ta a disposición de la xente aficionao a la bicicleta de monte o al senderismu y de los/es amantes del caballu.

https://smra.asistentevirtualdeturismo.es/ruta-anillo-aurelio-smra.htm

Altu La Vara-El Sutu

Forma parte del Paisaxe Protexíu de los Valles Mineros y xune los conceyos de Llaviana y Samartín del Rei Aurelio. Tien un estensión de 11 kilómetros que se puen facer a pie o en bicicleta.

La Bovia-La Colladiella

Tien 11,5 kilómetros de llargor y xune los valles de Sanamiés y Santa Bárbola. Considerada de bastante dificultá, traviesa parte del territoriu del Paisaxe Protexíu de los Valles Mineros.

Carrocera-La Güeria

Esti camín sigue’l trazáu del antiguu ferrocarril que tresportaba’l carbón dende la mina La Encarná y va paralelu al ríu Silvestre. La ruta empecipia en Carrocera y sigue pel valle La Güeria. El percorríu tien una duración de 45 minutos.

L'Entregu-Valle de Santa Bárbola

Parte de L'Entregu pela carretera de Bédavo y pasa per pueblos como La Envernal, L'Armendite o Llavayos hasta enllazar col valle Santa Bárbola, dende’l que se pue subir a La Colladiella y al picu Tresconceyos.

L'Entregu-La Camperona

Nel camín d’esta ruta atópase l’área recreativa del mesmu nome, la capiella de San Nicolás y la bocamina de La Bornaína.

Blimea-La Casilla

La ruta empecípiase dende Blimea pela carretera d’accesu a La Casilla pa continuar depués hasta La Campeta y siguir per Cabañesnueves hasta baxar, pel valle La Campana, al pueblu Samartín.

Paséu Fluvial

El paséu fluvial va peles riberes del ríu Nalón, d’oeste a este, travesando tol conceyu y enllazando col de los conceyos vecinos de Llaviana y Llangréu. Tien dellos accesos ente les trés localidaes urbanes: Blimea, Sotrondio y L’Entregu.