El llugar de Blimea ye la tercera población del conceyu en númberu d’habitantes. Ente esti nucleu y el de Sotrondio afáyase’l parque d’El Florán, na ribera’l ríu Nalón, amás del polideportivu, el campu fútbol, l’albergue xuvenil y l’IES Juan José Calvo Miguel, mesmo que’l Colexu Públicu El Parque.

Travesao poles aveníes del Principado y La Libertad, Blimea tien dellos equipamientos culturales d’interés como la Casona del Bravial -onde s’alluga la Oficina de Normalización Llingüística-, la biblioteca y el centru social de mayores, amás del Centru de Dinamización Tecnolóxica Local.

No cimero’l pueblu, en Llai, atópase la casa de los García Riaño. Construyida ente los sieglos XVII y XVIII conserva l’arcada doble de fábrica y una capiella dedicada a Santa Teresa na que destaca un retablu de madera. Nella vivió’l que fuere en 1837 el primer alcalde de Samartín del Rei Aurelio, el célebre Benito García Ciaño.

Ente los elementos patrimoniales del llugar destaca la ponte del Miramar. Construyóse pa pasar el ríu Nalón a pocos metros de la ponte La Oscura, en L’Entregu, nel marcu d’un proyectu de la Sociedad de Ferrocarriles de San Martín que pretendía sacar el carbón que s’estrayía na zona alta de la cuenca’l Nalón pel valle Carrocera en dirección Lieres pa que llegare al puertu d’El Musel, en Xixón. Esti proyectu de ferrocarril nun se remató y la ponte movióse nos años trenta pa Blimea, onde s’alcuentra anguaño.

Blimea celebra les fiestes patronales nel mes d’agostu, n’honor a la Virxe de les Nieves, y les Xornaes Gastronómiques de los Pimientos Rellenos, la primer selmana del mes d’avientu; amás de la Feria de Muestres y Esposiciones (FEMEX) a principios del mes de setiembre nel parque d’El Florán.