La constitución de Sotrondio tien l’orixe na xuntura de dellos nucleos de población más o menos dispersos que de la que diben creciendo fueron rompiendo los contornos pa fundise nuna única población urbana qu’adoptó’l nome. El restu d’enclaves tovía conserven la nomenclatura orixinal, son: El Serrallo, La Capilla, San Frechoso o L’Angariella.

Sotrondio ye la capital física de Samartín del Rei Aurelio, magar que dende l’añu 2008, a efectos alministrativos, la capital lleva’l mesmu nome que’l conceyu, esto ye, llámase tamién Samartín del Rei Aurelio. La localidá alluga la Casa Conceyu, el Xulgáu de Paz, el Serviciu Municipal d’Empléu, la sede principal de los Servicios Sociales y les oficines de la Policía Local. No referente a espacios culturales, cuenta con una biblioteca, un telecentru, la Casa la Mocedá, la Casa d’Alcuentru de les Muyeres y l’Aula Cultural La Plaza –espaciu polivalente pa esposiciones, charres y actos públicos–, amás del centru social de mayores y una escuela infantil pa nenos/es de trés meses a trés años.

El Serviciu Municipal d’Empléu afáyase nel antiguu consistoriu. L’edificiu, d’estilu modernista, contruyóse alredor del añu 1900. Tien trés pisos y remata nuna balaustrada na cornisa. Una de les fachaes mira pa la plaza Ramón y Cajal, onde s’atopa’l quioscu la música y una escalinata que fai d’escalera y de patiu butaques pa dellos actos.

La localidá, vertebrada pol ríu Nalón, tien ente los sos elementos patrimoniales más destacaos les pontes de Los Gallegos y La Maquinilla. La primera d’elles integrábase dientro’l ramal de Santa Bárbola de la Compañía del Ferrocarril de Langreo, na llinia Llaviana-Sama, mientres que la ponte La Maquinilla comunicaba l’antigua esplotación del Rimaero col ramal ferroviariu que daba a les mines de Santa Ana. 

No festivo, Sotrondio homenaxea a San Martín -el so patrón- cada 11 de payares, nel marcu de la Fiesta Gastronómica de Los Nabos, amás de festexar en veranu, nel mes de xunetu, les fiestes veraniegues tradicionales.