El mayor de los trés nucleos nos que se divide’l conceyu ta travesáu pol ríu Nalón y la carretera AS-17 que xune Avilés col Puertu Tarna, tamién conocida como “el corredor del Nalón”. Inaugurada en 1997, ye ún de los viaductos más llargos d’España, con un llargor de 1.244 metros.

La disposición ortogonal de les calles, d’acorde cola planificación de los años venti, ye una de les característiques urbanístiques principales de L’Entregu. Na entrada este atópase’l polígonu empresarial de La Central, qu’alluga empreses de dellos sectores, amás del Centru d’Empreses del Nalón, el Parque Bomberos o’l Serviciu d’Inspección Técnica de Vehículos. Cruciando’l ríu, nel llugar onde taba l’antiguu llavaderu de carbón de Carrocera, llevanta’l centru comercial d’ociu “Valle del Nalón”.

El barriu La Vega y los de San Xuan, Santa Bárbola y El Coto formen parte de les barriaes obreres que se construyeron pol mor de les esplotaciones mineres de carbón. Próximu a elles, el parque de La Llaguna ye una zona verde bien amplia na qu’hai delles especies d’árboles singulares, ente les que destaca la guindal, el carbayu americano, el pinu himalayo o’l magnoliu.

Dispón de zones de xuegos pa nenos y nenes y nél destaca’l quioscu la música, obra d’alredor de 1920, de planta poligonal, escalera frontal, barandiella de fierro y cubierta de bóveda de perfil ondulao, que convive nel espaciu con una estatua en bronce de Dimas Martínez, célebre doctor de la localidá. Esculpida por Félix Alonso Arenas, descubrióse en mayu de 1986. De la mesma manera, nos xardinos hai una llosa en piedra arrodiada de flores n’homenaxe a la figura de José María Suárez Rodríguez, fundador del parque.

El parque acueye tamién l’Edificiu de Servicios Municipales, un local acristaláu de planta baxa onde ta la sede de los Servicios Sociales, la oficina de l’Asociación de Comerciantes y Empresarios (ECOSAM) y l’Antena de la Cámara de Comerciu d’Uviéu.

Nun llau del parque afáyense otros servicios públicos: el Centru Salú y el Centru de Persones Mayores, el Colexu Públicu El Coto y l’IES Virgen de Covadonga, la estación de RENFE, les barriaes d’El Japón y Fradera y el campu fútbol Nuevo Nalón.

Nel centru la localidá tamién s’atopa la plaza d’El Jardinillo, col monumentu al escritor Leopoldo Alas Clarín, autor decimonónicu que casó cola entreguina Onofre García Argüelles. El monumentu fízolu Fernando Alba y colocóse en 1984 pa conmemorar el centenariu de la publicación de “La Rexenta”.

Pel centru tamién s’alcuentren el teatru y la plaza la ilesia, y nos anexos, nel barriu La Cascaya, sobresal el castillete del pozu Entrego, la que ye la esplotación minera vertical más antigua de les que se ficieron n’Asturies nel periodu de desarrollu industrial del sieglu pasáu. Al llau, llevanta l’Edificiu Teconolóxicu E-TIC, qu’acueye delles empreses rellacionaes coles nueves tecnoloxíes de la comunicación, amás del Centru de Nanotecnoloxía y Nanociencia.

Na periferia urbana ta’l Muséu de la Minería y la Industria, ún de los más visitaos d’Asturies, y el Pozu Sotón, qu’ofrez una visita turística única al interior de la mina y les dependencies esteriores.

En L’Entregu destaca la festividá veraniega de La Llaguna, nel mes de xunetu, y les Fiestes Gastronómiques de Les Cebolles Rellenes, nel mes de payares, n’honor a San Andrés.