La brillante aportación del doctor Enrique Martínez en tolos ámbitos de la medicina nos qu’intervino y los incontables méritos académicos, profesionales y personales colos que tien desempeñao la so trayectoria al serviciu la medicina, llevó a l’asociación Calvo Miguel a consideralu merecedor del nomamientu de Fíu Predilectu y promover la so candidatura pa esi propósitu, aprobada pol Plenu Municipal nel añu 2010.

La d’Enrique Martínez ye una trayectoria exemplar. Nacíu en Sotrondio, tuvo décades exerciendo una estensa y importante llabor médica, d’investigación y docente. Desempeñó la so actividá como ciruxanu en dellos hospitales asturianos como’l Sanatorio Adaro, l’Hospital Virgen de Covadonga, l’Hospital de Cabueñes y l’Hospital Central d’Uviéu, practicando más de 12.000 intervenciones quirúrxiques a lo llargo la so etapa profesional.

Ye’l primer asturianu doctoráu en medicina pola Universida d’Uviéu, y primer catedráticu de ciruxía de la Universidá d’Uviéu, siendo anguaño Catedráticu Heméritu na Facultá de Medicina. No académico y na docencia, tien participao en munchísimos congresos nacionales y internacionales, tamién desarrolló actividaes de xestión y planificación asistencial, docencia y investigación.

Tamién ye autor d’un gran númberu de publicaciones de llibros, artículos en revistes y prensa y merecedor de múltiples premios científicos, amás de beques y ayudes pal desarrollu d’investigaciones. Amás recibió multitú d’honores y distinción na so carrera profesional.

El nomamientu de Fíu Predilectu ye una distinción honorífica que se concede a quien, naciendo en conceyu, destacare de manera relevantes poles sos cualidaes, méritos personales o servicios en beneficiu o honor al conceyu, cualidaes toes que pesaron nel movimientu asociativu primero y na Corporación Municipal depués pa brinda-y esti reconocimientu.