Nació en L’Entregu en 1942. Llicencióse primero n’economía y consiguió depués el títulu de periodista na Escuela Oficial de Periodismo de Madrid, pa más tarde exercer como periodista en La Voz de Asturas, la revista Asturias Semanal, Cambio 16, Diario 16 y La Hoja del Lunes. Tamién dirixó los diarios La Provincia, en Las Palmas; y Asturias, diariu rexonal; amás de ser delegáu n’Asturies de l’Agrupación de Periodistas Deportivos; presidente de l’Asociación de la Prensa de Oviedo y autor de los llibros “La Historia del Deporte Asturiano” y “La Costa Asturiana”.

Dirixó La Nueva España dende finales de 1990 hasta l’añu 2000, consiguiendo modernizar los conteníos y el diseñu hasta convertir esti diariu nún de los más destacaos a nivel nacional, pola so difusión y amplia llectura. De les sos virtúes periodístiques, los sos compañeros de prensa destaquen «l’usu esquisitu del llinguaxe, la minuciosidá, el rigor y la ponderación nos sos xuicios», dalgo de lo que vien presumiendo tou esti tiempu.

Medaya de Plata al Méritu nel Trabayu

En 2007 recibe la Medaya de Plata al Méritu nel Trabayu de mano del ministru José Luis Caldera y al añu siguiente, en 2008, condecoráronlu col títulu honoríficu de Fíu Predilectu de Samartín del Rei Aurelio, p’asina facer un reconocimientu públicu de la so trayectoria profesional y la so calidá humana, mesmo que por promocionar la imaxe del conceyu fuera d’Asturies y porque tuvo siempre vinculáu a esti conceyu que lu vio nacer, amás de pol so espítiru constructivu y humanidá.

Melchor Fernández destacó pola pluralidá temática de los sos testos y pola imparcialidá que mostró a lo llargo de la so estensa trayectoria profesional, camín qu’empezó na década de los 60 coles dificultaes que surdén d’una sociedá ensin llibertá d’espresión nin de prensa y a la que siguió un periodu de transición que permitió que persones como Melchor llideraren lo que foi la gran aportación de la prensa a la democracia, hasta llegar al cume’l periodismu nes esferes más altes.