Naz el día 23 de febreru del añu 1914 en Samartín. Foi alumnu de Juan José Calvo Miguel y estudió la carrera de medicina.

N’acabando los estudios superiores, ingresó como mélicu de guardia del Sanatoriu Adaro nel añu 1936, de la que’l centru hospitalariu yá pertenecía a la Mancomunidad de Empresas Mineras e Industriales de Asturias, tres que lu fundare l’inxenieru D. Luis Adaro nel añu 1910. D. Vicente convirtióse nun pilar básicu d’esta institución na que sobre too tuvo centráu nos traumatizaos nes mines y empreses industriales asturianes.

Nel Adaro centró tola so atención. Mui estudiosu, les ansies de saber lleváronlu a viaxar pelos centros europeos más prestixosos na so especialidá. Nellos conoció a los traumatólogos de mayor prestixu, colos que tuvo en contactu, pa deprender los sos saberes y les sos formes de trabayar. Llegó a ser dellos años un pedestal firme del sanatoriu Adaro.

Destacó siempre pol esfuerzu, la disciplina, la eficacia reparadora y salvadora de vides humanes. Convirtió la medicina nuna ciencia enllena de simplicidá y humanidá. Cargáu de conocimientos na so especialidá, traxo al Adaro técniques y procedimientos nuevos, en rellación directa col actu quirúrxicu y el tratamientu de politraumatizaos, quemaos y parapléxicos. En morriendo, la so impronta foi quedando patente nel conceyu.