El 4 de xunu de 2009 la banda asturiana Nuberu, compuesta por Manolo y Chus Pedro, recibió la Medaya d’Oru de Samartín del Rei Aurelio en reconocimientu a la so trayectoria artística y a la so contribución a la cultura asturiana. La distinción municipal coincide cola inauguración de la esposición pol mor de los 30 años de carrera musical, baxo’l título “Ya llovió. Treinta años de Nuberu”.

La distinción honorífica, que s’afletare primero nel plenu municipal celebráu’l 25 de setiembre de 2008, supunxo la incorporación de la corporación al homenaxe que dende la sociedá asturiana, entidaes y otros ayuntamientos, se-y rindía a Nuberu l’añu la so despidida.

Chus Pedro y Manolo dieron los primeros pasos nel mundu la música en 1978 con un conciertu nel Cine Sindical nel que presentaben el so primer trabayu discográficu “Asturies, Ayeri y Güei”. Anguaño son un clásicu y un referente de la música y la cultura asturiana.

La emoción y el sentimientu inundaron siempre les composiciones que Nuberu-y brindó a la so tierra y a los sos paisanos. La defensa de les señes d’identidá de la cultura asturiana foi otra de les máximes na so estensa trayectoria.

La Medaya d’Oru del conceyu ye una de les distinciones de mayor prestixu de les que concede’l Conceyu, cola que se premia y se reconocen los méritos estraordinarios que concurren en persones, entidaes o corporaciones por ofrecer los sos servicios a la ciudá.

Nel casu de Nuberu simboliza la so implicación pa cola defensa de la llingua asturiana, les raíces de les cuenques mineres o la reivindicación de les llibertaes, qu’abanderaron a lo llargo la so carrera..

Tuvieron más de trés décades ofreciendo conciertos per Asturies, España y otros países como Holanda, Bélxica o Alemaña, cantando en solitario o acompañaos por otros grandes de la música como Víctor Manuel y Ana Belén, Luis Eduardo Aute, Illegales o Llan de Cubel, ente otros, que dexen un legáu bien fondu de cientos de conciertos y álbumes emblemáticos como “Cancios d’un país”, “Mineros”, “Agua de la fonte clara”, “Nuberu nel Tiempu” o “Tributu a Nuberu”, ente otros.